ፍትህ ቢሮ ከማህበረሰብ አቀፍ ድርጅቶች በተለይም ዕድሮች እና የዕድር ምክር ቤቶች ጋር በሰው መነገድ ወንጀል መከላከል ዙሪያ የሚመክር መድረክ ተዘጋጅቷል ።
የአዲስ አበባ ከተማ አስተዳደር ፍትህ ቢሮ ህይወት ኢትዮጵያ ከተባለ በጎ አድራጎት ድርጅት ጋር በመተባበር በአዲስ አበባ ከተማ ዉስጥ ካሉ ዕድሮች እና ከዕድሮች ምክር ቤት ከተወጣጡ አካላት፣ ከፍትህ ቢሮ ዓቃቢያነ ህግ እና ከሲቪል ማህበረሰብ ድርጅቶች ከተወከሉ አካላት ጋር በሰዉ መነገድና ሰዉን በህገወጥ መንገድ ድንበር ማሻገር ወንጀል መከላከልን አስመልክቶ ውይይት ተደርጓል ።
በውይይቱ የመክፈቻ ንግግር ያደረጉት በፍትህ ቢሮ በሰው መነገድና ሰውን በህገወጥ መንገድ ድንበር ማሻገር ወንጀል ተከላካይ ትብብር ጥምረት ጽ/ቤት ኃላፊ አቶ ዮሐንስ ብርሃኑ እንዳሉት ዕድሮች በሰው መነገድና ሰውን በህገ-ወጥ መንገድ ድንበር ማሻገር ወንጀልን ለመከላከል በደንብ ቁጥር 126/2014 እንዲሁም የአ/አ/ከተማ ዕድሮችና የዕድሮች ምክር ቤት ቁጥጥርና ፈቃድ አሰጣጥ መመሪያ ቁ. 151/2016 መሠረት ዕድሮች ለአበላቶቻቸዉ ስለ ወንጀሉ አስከፊነት ግንዛቤ በመፍጠር፣ ጥቆማ በመስጠት፣ ከህግ አካላት ጋር በመተባበር ማህበራዊ ኃላፊነት ከመወጣት አንፃር በተለይም ኢ- መደበኛ ፍልሰትን በመግታት ሂደት ዉስጥ ዕድሮች ያላቸው ሚናን በመረዳት በሕጉ የተሰጣቸውን ሃላፊነት እንዲወጡ እና በዕድሮች መተዳደሪያ ደንብ ዉስጥ የፍልሰት ጉዳይን በማካተትና አጀንዳ በማድረግ አባላቱንና ቤተሰቡ ከወንጀሉ እንዲጠብቁ ሃላፊነታቸውን እንዲወጡ በማድረግ ፣ የህዝብ ተሳትፎ በወንጀል መከላከል ሂደት ዉስጥ ጎልቶ እንዲወጣ የማድረግ ከሌሎች ባለድርሻ አካላት ጋር ተቀራርቦ መስራት እንደሚያስፈልግ ገልፀዋል ።
የህይወት ኢትዮጵያ በጎ አድራጎት ድርጅት ፕሮግራም አስተባባሪ የሆኑት አቶ አበራ ወንድሙ በበኩላቸው ዕድሮች ወንጀሉን በማስመልከት በመከላከል የግንዛቤ ፈጠራ በማድረግ ከሚመለከታቸው አካል ጋር በቅንጅት በመስራት እና ጥቆማዎችን እንዲሰጡ በማድረግ በዕድሮች መተዳደሪያ ደንብ/መመሪያ እንዲካተት የታሰቡ መነሻ ምክረ ሃሳቦችን አቅርበዋል።
የአዲስ አበባ ከተማ አስተዳደር እድሮች ምክር ቤት ፕሬዝዳንት አቶ ታምራት ገ/ማርያም ስለ እድሮች ምንነትና ተግባራት እንዲሁም ዕድሮች ህጋዊ በመሆን ከቀብር ማስፈፀም ባሻገር በተለያዩ ማህበራዊ ችግሮች በተለይም በሰው መነገድ ወንጀልን ጨምሮ በሌሎችም የሰላምና ልማት ጉዳዮች ዙሪያ ከመንግስት ጋር በመተባበር እየሰሩ መቆየታቸውን ገለጻ አድርገዋል።
በመጨረሻም በምክረ ሃሳቡ ዙርያ ለተነሱት ግብአት እና ጥያቄዎች የትብብር ጥምረት ጽ/ቤት ኃላፊ አቶ ዮሐንስ ብርሃኑ እና የአ.አ ከተማ እድሮች ምክር ቤት ፕሬዝዳንት አቶ ታምራት ገ/ማርያም ምላሽ በመስጠት መድረኩ ተጠናቋል ።
ነሐሴ15/2017
ፍትሕ ቢሮ
Comments
ምንም አልተገኘም.
አስተያየቶችዎን ይተዉት.